政府難得的好建設(雖然都慢咗,台灣同大陸都一早有喇!),全自助24小時圖書站開幕喇!方便到好似汽水機買嘢飲咁,食完宵夜或者失眠都可以落嚟逛吓睇吓有冇書啱借~

 

正正位於電影資料館同港島東體育館中間,相信東區人都約莫知喺邊,如果搭地鐵嘅話西灣河站行嚟都係十分鐘左右。(可以順路途經太安樓,掃完街一路慢步行嚟效果更佳)

 

裡裡外外都用「竹」做主題,點解呢?原來設計概念係源自古人以竹簡造書,而竹就可以採納自然光同空氣。雖然個站唔大,但有兩塊高木塊,俾人睇書或擺吓嘢咁,都幾細心。

 

 

站內大概有三百本書,中英文書嘅比例係65:35,唔同種類嘅書都有,同流動圖書館差唔多。

 

唔止借書㗎~仲可以還書,拎預約咗嘅圖書館資料,同埋用八達通還錢俾圖書館。(提提大家,冇得續借,要續又去唔到圖書館就download返圖書館個app啦~)

記住記住記住,每日朝早10:15-11:45係會暫停服務,職員會增補同埋收返圖書。

其他區嘅朋友如果羨慕都唔洗羨慕太耐,因為康文署話下年年尾喺尖沙咀文化中心同大圍地鐵站附近都會起呢個設施呀!東區嘅朋友,平日無論玩到幾夜都不妨去參觀吓~

 

Photo & Text: David 大胃