近排打咗幾次war game,由第一次去好驚青到而家自在咗啲,真係好好玩呀~第一次去打之前都想像唔到究竟點運作,而家用一個女仔嘅角度,同大家分享吓一啲有關war game嘅ABC:

 

  1. 喺邊度打?

分室外同室內兩種,室外自然就係戶外,要考慮埋天氣,而場地都大啲真實啲。近年興嘅室內場就通常喺市區工廈,方便啲又舒適啲,有冷氣嘆~

 

  1. 玩幾耐?

通常都係大概四個鐘,有啲公司都有提供兩個嘅場次。但我覺得兩個鐘會唔夠喉囉~

 

  1. 幾多個人玩?

最理想就十幾個至廿幾個人,最低消費六個至十個都見過。

 

  1. 應該著咩衫去?

如果你唔驚痛又唔驚留「啦」,咁你就唔洗理呢條,著咩都得架喇!但我驚喎,所以著咩都要諗好耐 : P 。一般大家都會話要著啲夠厚,又方便郁動嘅衫,根據我僅有嘅經驗+參考吓其他女仔嘅著法,我建議大家著一隻運動型厚衫再加件厚風褸。而褲都唔好著太薄呀,如果中彈真係會打到瘀!鞋就唔好著converse果啲,如果有運動boot就最理想,打到腳眼都唔係唔痛架…

 

  1. 要帶咩去?

War game場一般都有裝備租,會包括頭盔、面罩、背心、手套、槍、BB彈等,全幅裝備大約$100-$180不等。如果唔租裝備,就要帶私伙喇~

 

  1. 個流程係點?

喺休息區預備、補充彈匣—>入戰場—>休息、補充—>入戰場……
每個回合都可以有唔同野玩,有唔同分組/玩法,睇主持人點帶領。

 

  1. 收費?

計人頭收費~整個session大約$1XX-$2XX一個人。

 

  1. 遊戲時要注意嘅野?
    – 出入戰區要拆彈匣。
    – 戰場口通常都有試彈區,可以試下自己識唔識開槍,唔識記住問人呀!
    – 如果中彈,就應大叫死咗,然後舉住雙手離場/去死人區(當然有啲遊戲有得復活就另計),千其唔好中咗彈又扮唔死繼續玩,咁樣非常唔尊重遊戲呢。
    – 近距離見到敵人時,可以叫「bingo」,以免敵人太近距離中彈。

 

我相信每一個活動嘅世界都好大同埋有佢嘅專業,war game都係!唔敢拋書包講太多更自暴其短,如果睇到呢個post嘅女仔如果有興趣試玩,歡迎一齊探索吓呀~

 

Text: David 大胃

Photo: Element Envato