「沙丹豬扒飯」,茶餐廳會出現嘅碟頭飯,冇男人嘅浪漫豆腐火腩飯、show me your love栗米肉粒飯咁出名,而問十個人有十個都唔知沙丹豬扒飯究竟exactly係點樣,剩係知係一種有汁入得口嘅豬扒飯。就等我解構吓沙丹嘅真面目啦~

沙丹豬扒飯係澳門同香港茶餐廳獨有嘅嘢食,咁「沙丹」係咩呢?有英文譯sadan或satay,有人認為沙丹係一個地方,但到而家都唔知道係講緊邊度;又有人話沙丹即係沙灘,但又唔見得喺沙灘呢碟飯特別出名;又有人話沙丹即係「standard」,係最例牌嘅豬扒飯。我覺得最有可能嘅解釋係呢個:茄汁雞肉火腿蛋嘅葡文係Carne Galinha c/Fiambre e Ovo à Saturn,而沙丹同「saturn」音似,因此俾後人咁樣用咗。

所以,沙丹豬扒飯一定要有茄汁(茄醬)、火腿、同埋蛋,而隻蛋仲一定要係太陽蛋添!

隨住唔同茶餐廳嘅創意,有時塊火腿又可以轉做腸仔或者煙肉,塊豬扒又可以變做雞扒或魚柳。總之,塊浪吓浪吓嘅太陽蛋係走唔甩!

Text & Photo: David 大胃