大坑,一個未被連鎖食肆侵佔的地方,幽靜中卧虎藏龍,小館林立,傳說Eason經常到此區覓食。中華遊樂會對面一間淡紫色新店上場,價錢合理,主打區內獨有上海菜,雖是開業僅半年的新店,但原來故事源於四十多年前的銅鑼灣巷仔茶檔。

這日傍晚來到,店中就只有主廚郭先生,一助廚一侍應,三人營運一店,小小廚房但煮出來的菜式不獨沽一味,上海菜式應有盡有,各有特式。郭先生原來是「德成巷仔」老闆的哥哥,當年巷仔結業後向外闖,煮上海菜已有十多年經驗。到上年德成巷仔重光,妹妹不甘將學有所成的哥哥收埋自用,故在同一條街開一間上海小館讓哥哥大展所長。

黑醋骨菜飯 $52

排骨酸甜味恰到好處,份量唔少食極都仲有。菜飯用雞湯煮成,唔係大家樂菜飯一般好有咬口嘅菜,但粒粒菜和米都滿有鮮味。

小籠包 $38

皮薄同時又夠韌裝住晒濃濃湯汁,餡肉肥瘦比例平均,一個人食晒四粒都唔覺過膩。

醉雞 $58

大熱天吃一口冰凍醉雞真係享受,酒味鮮味誰也搶不了誰風頭。

糯米燒賣 $24

呢味有驚喜,睇個樣以為剛蒸起一定好濕,但咬落煙韌乾爽,令人一口接一口。

紅油抄手 $28

師傅提我記住點到醬汁裡的碎蒜,聽話發現果然好食。

店內坐位不多,裝修簡單,期間有熟客母女放學後來光顧,也有講普通話的洋人。我吃著家常小菜,看著窗外街坊發呆,慢慢跟上了大坑的節奏。

小牡丹 (逢星期二休息)

地址:大坑銅鑼灣道58號地下
電話:23602912