了解過大坑德成巷仔嘅身世就知佢愛懷舊,適逢「重光」一週年,茶檔推出各款港式扒餐,每日黃昏六點鐘就會熜燈變身成懷舊扒房。

 

首先推介呢個:瑞士乳鴿餐 $198,包括煙三文魚鮮果沙津、瑞士汁乳鴿 (1隻)焗金寶白汁雞皇飯 焗肉醬意粉。

餐湯有例牌紅白二湯任揀一款;
餐包熱辣辣上碟好香口,入面仲有提子乾粒粒!食完想添多個!
煙三文魚鮮果沙津絕對名副其實,平時餐廳食沙津都係薯仔多過鮮果,但呢碟真係舊。舊。都。係。蘋。果!都要大大舊添!

主角乳鴿出場!咪以為佢咁深色好似傳統紅燒乳鴿,實情係瑞士汁已經煮得非常入味,深入乳鴿每寸肌膚。乳鴿有肉地之餘肉質非常嫩滑,啖啖肉都唔覺滯。特別想講塊皮真係好入味,女士千其唔好驚肥而唔食呀!

飽肚類二揀一我揀咗焗肉醬意粉,芝士肉醬俾得好豪爽,啖啖都拉住絲絲芝士。意粉粗身鬆軟,一食真係有陣童年回憶感覺,係細個開大食會會食到嗰隻意粉!

 

跟住一試焗芝士龍蝦餐 – 有得揀配豬扒($158)、雞扒 ($158)、牛柳 ($188)

係經典嘅牛頭鐵板呀!配菜有西蘭花同車厘茄,薯條底。

芝士焗龍蝦大隻多膏,有心思位係撩撩下發現原來放埋蟹籽一齊焗,口感好過癮。

一路食當然要飲德成巷仔招牌嘅樽仔奶茶~每日限量一百支,茶味同奶味互相平衡,又唔會太甜。

最尾以招牌焗梳乎厘作結~即叫即焗大概等十五分鐘,新鮮焗出嚟充滿空氣感,仲大過我個頭,兩至三個人share一個啱啱好~

 

德成巷仔
地址:香港大坑銅鑼灣道96 號A 地鋪
電話:22599055