Click入嚟睇嘅你,唔知係俾「滋味」吸引定係「人情味」吸引呢?呢兩樣古難全嘅味道喺呢間小店終於可以合體出現!

西營盤電車路近日出現咗間紫色外牆、好搶眼嘅中菜館,原來係大坑小店小牡丹嘅分店。小牡丹出身於一個飲食家族,喺上年開始經營地道上海菜,服務一眾街坊。今次衝出大坑,新店更寬敞,供應嘅食品更豐富:揭開小牡丹本厚厚的menu,傳統京川滬菜式樣樣有,款式之多屬區內罕見。

涼拌海蜇 $52

爽口彈牙,開胃最啱。條條都有返咁上下粗,絕無揸流攤。

夫妻肺片 $68

川菜館必點,煮得好入味,除咗夠辣之外又保留到食物原味。

雲吞雞(半份) $158

雲吞非常足料,比起平時嗰啲大舊。個雞湯有雞味得嚟完全唔覺鹹,味道啱啱好。抵食~

清炒河蝦仁(例) $118

看似平平無奇嘅考功夫菜式,粒粒蝦仁爽滑彈牙,不老不軔。

酸菜大魚片(例) $158

魚完全冇骨,非常鮮滑,入面有好多大豆芽菜、酸菜,最驚喜係有紅薯粉墊底。紅薯粉索晒湯底嘅鮮味,可以食好多碗(不過就好辣喇~)。

小籠包(4隻) $40

戲玉,水準如大坑店一樣,皮薄餡靚,豬肉肥瘦平均,湯汁充足唔油膩。不枉此行!

上海炒年糕 $68

年糕煙韌彈牙,醬汁香濃,有少少微辣。

餐飯好唔好食與否,除咗取決於食物,氣氛都好重要。不得不讚店內職員嘅服務態度,位位謙和有禮,令餐飯食得舒適愜意。小店就係呢樣好,所以真係要大大力支持!

 

小牡丹

西環德輔道西296-302號良基大廈地下1-2號舖